Puma為咗推廣世界盃，就同當地一個電台（KissFM）搞咗一個同聽眾玩嘅遊戲節目，喺世界盃兩星期內免費請得獎聽眾遊船河。
船行經嘅河叫做Spree，河畔景色優美。遊船就係由Puma贊助，入面有自助餐食，仲有沙灘bar、小型足球場等等，真係大人細路都啱玩㗎！
以前我喺科隆居住嘅時候都好少搭船，當地人亦都係一樣，好少會以渡輪做交通工具。只有遠方嘅朋友嚟嘅時候，我先會帶埋朋友搭船。
涼風吹拂夠晒寫意
其實喺科隆搭船遊覽係好enjoyable㗎，因為萊茵河就係穿過科隆市，而萊茵河流經嘅地方都好靚，而且搭船嘅時候有啲風吹埋嚟都幾寫意，但係搭地鐵同巴士就冇呢啲感覺啦，所以係好值得喺科隆遊船河㗎！各位有機會嚟科隆，記得遊船河呀！
袁彩雲
無綫世界盃直擊主持