戴夢夢、梁靖琪（Toby）、鄧穎芝同陳苑淇等女子明星足球隊其中6名成員為咗應付下個禮拜日（7月2日）同香港先生嘅足球友誼賽，噚日嚟到九龍灣會議展覽中心頂樓嘅足球場操練，由專業教練教導各人足球盤扭等技術。
Toby獲讚「好波」
雖然各人球技平庸，只有網球運動員出身嘅李思雅同Toby表現較為出色，但佢哋喺分組比賽嗰陣嘅茅招就異常出眾，拉衫、掃腳層出不窮，起先一班女足球員表現認真，但當戴夢夢向Toby掃腳之後，眾女星索性捨腳用手，恍如打攬球一樣帶波入網，而守龍門嘅陳苑淇更索性托住個龍門滿場走，情形搞笑，亂過早前世界盃葡萄牙對荷蘭隊。
戴夢夢接受訪問時語帶相關話：「Toby最好波啦，身材好好，腳法就係思雅最好，人哋運動員出身。」夢夢又話唔擔心同香港先生比賽嗰陣會俾對方抽水，因為女子隊好可能出茅招。對於被隊友盛讚身材好嘅Toby話：「好波？OK啦，但有時都會因為身形而尷尬㗎。至於係咪負擔就唔知喎，因為我都未試過冇咗佢哋。」
