紅籌、國企在昨日悶市中帶來多少刺激，個別中資金融股跌完一輪後，有大行出嚟推介，股價即時生猛番。不過，經紀黃叫小初玩時玩，識上車時要識落車，因為今個星期五就係半年結，唔排除芬佬櫥窗粉飾完後玩失蹤。
除咗大價股外，細價股都陸續有搞作，其中大誠電訊（8003）無端端勁升62.9％，收0.285元，喺淡市之中尤其矚目，雖然成交唔算好大，只得449萬銀，但又唔多似係mark價。
經紀陳話，大誠剛於6月初，公布按每股0.105元，配售5640萬股新股，集資額590萬元，淨係計賬面數，新股認購人賺咗1倍都唔止。
大誠今日公布全年業績，但睇過首3季業績都虧損，斷估全年業績冇理由會有驚喜。
至於股價一度大上大落的旭日環球（353），亦在昨日發力抽上，升18.6％，收0.415元。隻股早排話計劃配售4000萬元可換股票據，但昨日市場則傳出可能配股。
慕容小初