瑞士對烏克蘭要打至加時互射12碼，班入場球迷自然最着數，話晒錢已經畀咗出嚟，嚟球場享受接近3個鐘，你話幾爽呢！
有線直擊隊噚日喺科隆，直擊瑞士對烏克蘭呢場16強大戰，可能戲碼唔算強關係，現場嘅氣氛比其他比賽遜色。開賽前幾個鐘，部份瑞士球迷喺巿中心聚集，一齊睇意大利對澳洲大戰。
瑞士球迷好齊心，同為澳洲打氣，問佢哋點解，球迷話唔想意大利出線，因為瑞士晉級後會對呢兩支球隊嘅勝方。不過唔好彩，瑞士最後輸咗畀烏克蘭，呢班瑞士躉嘅如意算盤打唔響。
臨開波前，直擊隊咁啱遇到位香港球迷，同佢傾過幾句，佢話今場瑞士對烏克蘭嘅波飛臨場搵黃牛買，原價60歐元嘅平價票，𠵱家炒到200歐元，算係合理。香港球迷仲話，瑞士呢場門票比較容易買黃牛，相比前一日葡萄牙對荷蘭，有錢都未必搵到。
巴西襯晒多蒙特球場
直擊隊稍後會到多蒙特，為大家報道一下巴西對加納嘅場邊花絮，早前直擊隊曾經到過多蒙特球場踏過草皮，事先感受世界盃氣氛。多蒙特呢個球場設計幾好，我哋入埋球員更衣室、出場通道同觀眾席，發覺設施新淨之餘，個外形仲好吸引，巴西喺度比賽，仲襯晒主場既黃色，氣氛應該無得彈。
有線06世界盃嘉年華，將於今晚9:00pm——11:00pm，播出世盃外景隊採訪滙報