烏克蘭周一憑互射12碼，淘汰零失球嘅瑞士出局，前者教練布洛堅竟然畀電視台攝影師拍到喺12碼階段唔敢睇，自己走鬼咗入更衣室，都算係細膽之最咯！
布洛堅球員時代型到飛起，做教練都有番咁上下台型，但係自己隊波互射12碼嗰陣，佢竟然冇膽到走咗入更衣室，連自己個愛將舒夫真高宴客都唔知，最後記者話佢知隊波贏咗晉級，先衝番出場。布洛堅話：「冇呀，我冇睇，我走咗入更衣室，我承受唔到嘛！」
承受唔起壓力恐損軍心
人人都有壓力，布洛堅靜雞雞走入更衣室，喺國際球壇都算少見，最多有教練會擰轉面唔睇，話晒做教練都應該睇住場上有咩變卦，呢啲嘢隨時會影響下仗嘅比賽嘛；所謂踢波如打仗，教練如將軍，布洛堅冇膽到離場唔睇，軍隊呢場失去將軍不特止，仲影響埋隊波嘅軍心！判官就認為佢差啲大將之風，如果烏克蘭輸波佢係咪唔出嚟呢？
判官話
布洛堅都算係今屆型教練之一，估唔到12碼都唔夠膽睇，今次都算失威咯！
冇膽指數：★★★★
註：以5★為最高
專家話：壓力致教練避席
「我見過有些教練，在球隊以12碼分勝負時，只望向觀眾席，從球迷表情以確定皮球是否入網，而布洛堅在編好主射球員後，便離開後備席，相信主要因壓力問題。」
網民反應：盧班洛夫斯基有台型
網民又對布洛堅的行為有何看法呢？「佢話晒都係蘇聯時代嘅舒夫真高，唔係吓嘩！」「我們為瑞士鼓掌。」「我都係覺得盧班洛夫斯基有台型啲！」
世盃判官歡迎球迷來稿
世盃判官係1個在世界盃期間專為廣大球迷而設嘅欄目，球迷如對賽事有任何投訴、意見，想同我哋分享，就快啲投稿！來稿勿過300字。
世盃判官體育版電郵：[email protected]
體育版傳真熱線：23703534