近排樓市鬼咁靜，美國又議息在即，由於市場普遍預期美國會加息，香港亦好大機會跟隨，業界話，受息口因素影響，業主同買家𠵱家都抱住「睇定啲」嘅心態，雙方都轉諗租務市場，不過，租客就將租金價錢揸得好緊。
蘭西聽祥益地產盤嘉茵講，屯門租務市場最近幾活躍，單係倚嶺南庭，就連環錄得兩宗租賃個案，不過都係要業主減租先可以促成。
好似中層C室，面積788方呎，業主幾個月前以6500蚊放租，但一直租唔出，最近業主終於作出讓步，降價至6000蚊，終有租客承接，減幅約7.7%。
另外，低層F室，情況亦類同，單位757方呎，業主早幾個月以6000蚊放租，但冇人問津，結果減價至5500蚊，先覓得租客，減幅8.3%。