最近市道咁差，業主放盤叫價想進取啲都好難，尤其一批入伙盤，發展商舊年趁市道好時高價開賣，今年個市逆轉，樓價跌咗，好多業主難逃損手命運。好似將軍澳嘅君傲灣，業主陸續收樓入伙，市場頻頻出現蝕讓成交，蝕讓幅度由4到24%，但日前竟罕有地出現一宗業主賠定個案。
美聯郭玉滿講，君傲灣第3座高層D室業主，單位1051呎，原本有買家用520萬承接，後來有另一位買家肯畀多30萬，既然有買家肯出高少少價錢，業主就寧願賠償15萬定金比原先嘅買家，將個單位以550萬賣出，呎價5233蚊，係近期君傲灣二手成交中呎價最高。今次有買家肯畀高價入市，係咪代表君傲灣個價差唔多見底呢？
雖然原業主舊年用568萬買入單位，即使550萬賣出都要蝕，但就唔使蝕咁多，無咁肉痛。
睇番資料，君傲灣近排多宗蝕讓成交中，以1座低層C單位最傷，原業主足足唔見咗84萬。
郭玉滿又講，呢個月君傲灣嘅二手租務好活躍，有成41宗，呎租12至16蚊。
電郵地址：[email protected]
