今日係6月27號，我係陳方安生。近日嘅熱門話題，係七一遊行。我本人已經宣布我會參加，希望聯同抱有同感嘅市民，清晰表達我哋對民主、普選嘅訴求。自從人大常委就住2007年行政長官選舉，以及2008立法會嘅產生釋法之後，繼而，特區政府嘅政改方案，因為缺乏原則性嘅建議、缺乏普選嘅時間表以及路線圖而遭否決後，行政長官已經表明，喺佢任內唔會重提政改方案。
市民對民主嘅進展，感到非常無奈。
過去兩日，傳媒似乎將焦點放喺我個人嘅政治取向身上。我想強調，呢個唔係我個人嘅show，民主係屬於大家。我們應該着眼嘅，就係如何團結社會各階層人士，透過和平理性方式，表達我哋對民主、對普選嘅心聲，從而說服特區政府和中央政府就政制改革，作出更積極嘅回應。
《基本法》賦予香港高度自治、港人治港，呢個係根據鄧小平先生，勇敢、偉大、高瞻嘅一國兩制構思。回歸初期，中央政府的確有履行《基本法》嘅承諾，但近年似乎障礙重重，令市民對中央失去信心。要挽回市民嘅信心，係需要特區政府同中央政府，採取更積極嘅行動。我們唔好忘記，要有一個真正和諧、融洽的社會，有效管治香港，係需要建基於民主。一個人，或者係少數人嘅心聲，並唔能代表大眾嘅期望，所以我好希望，所有熱愛民主普選嘅市民，能夠七一齊齊上街，用行動表達我哋對民主對普選嘅訴求。團結就是力量，請各位為香港嘅將來出一分力，七月一日，維園見。
全文可瀏覽港台網頁： http://app1.rthk.org.hk/civilonline/civilsociety/wwblog/post.php