曾幾何時，本港物業拍賣活動盛極一時，幾間拍賣行每間一個禮拜都搞幾場，一次閒閒?拍幾十個單位，間中又有啲純銀主盤拍賣會，搞搞新意思。近年因銀主貨少咗，物業拍賣會嘅聲勢都無復當年勇。
最近，蘭西睇到有個拍賣廣告，只係拍一件居屋咁大把，仲係喺元朗天水圍嘅天頌苑M座17樓3室，約804呎，單位係承法院命，安排聽日拍賣。個單位貴極有譜，間拍賣行接呢單生意，睇嚟真係冇乜肉食。負責拍賣嘅係永利行。
不過，唔好睇小呢間公司，其實好猛料㗎，集團創辦人劉紹鈞喺72年成立「劉紹鈞產業測量師行有限公司」，係香港首間華人產業測量師行。87年仲將網絡伸延至亞太地區及澳州。92年喺內地成立第一間房地產諮詢顧問嘅中外合資公司，仲喺北京人民大會堂舉行成立典禮。當年深圳賣地，佢間公司都出咗唔少力。
劉紹鈞過去經常接受傳媒訪問，發表吓對樓市嘅意見，不過九十年代初佢做多咗內地生意，漸漸少咗搞本地項目，曝光率亦減。近年，佢個女劉詩韻逐漸接手公司業務，間中都有見吓報。