上屆世界盃，英格蘭嘅碧咸剪咗個非常突出嘅金毛箭豬頭，簡直型到爆，令各地少女為之瘋狂，唔少擁躉都爭相仿效。不過對我來講，印象最深刻嘅，就非朗拿度河童頭莫屬，佢嘅勇氣無人能及，真係要寫個「服」字畀佢。
上屆hairshow鬼咁精采，4年一別，今屆應該會過之而無不及喇。一心諗住睇吓班球員有咩特別髮型，可以作為參考，以便今個夏天同自己換個新形象，點知就好令人失望囉！好似碧咸、龍格保呢類成日喺時裝雜誌見到佢嘜頭嘅型男，今屆都冇咩新搞作，髮型都千篇一律，創意欠奉，只有巴西朗拿甸奴一頭飄逸嘅鬈曲長髮叫做有啲個性。
唔知碧咸係咪要掛住湊仔，搞到近排都冇咩時間變髮術。講真，今屆班球員嘅形象比較平實，搞到我呢班fans喺茶餘飯後都少咗好多talkingpoint呀。
彭浩翔
電影導演