侍仔：巴西又出場喇！難得佢哋喺早場現身，一定又多一批球迷落嚟睇波啦！
菠蘿文：佢哋分組賽最早嗰場都係12點，我第2日返早更都唔睇啦。𠵱家開11點，佢哋踢日波之餘，我哋又唔使捱夜。
招積域：是日推介巴西上盤，佢哋攻力咁強，對手加納又有艾辛停賽，中場掃蕩力大減；肥哨正式上力，唔殺加納不罷休！重注巴西上盤同波膽3:0！
侍仔：你又講廢話，係人都知啦呢樣嘢，可唔可以講啲獨到啲嘅嘢呀？
菠蘿文：巴西對非洲球隊係從未輸過，96年對過加納仲大勝8:2㖭！應該無輸嘅理由啦；加上之前對徒弟日本都大勝，今次都有能力殺埋呢個非洲徒弟。
哥尼路：咁又唔係喇，巴西教練彭利拿同加納好有淵源㗎，佢第一份教練嘅工作就係加納，多多少少都有感情，唔會大炒對方嘅，贏2:0或者1:0啦，買下盤都有機會執番半個。
招積域：巴西喎？入球點會細呀？肥哨上咗力，成隊波嘅入球亦不斷上升。
哥尼路：加納想贏就要喺初段狂攻，話唔定同墨西哥一樣有意外收穫㗎！艾辛停賽影響大，但非洲球隊冇話冇邊個唔得，所以加納下盤可以一試，但要贏就靠奇迹啦，或者鏟傷朗拿度啦！
招積域：千祈唔好呀！我買咗佢神射手㗎！肥哨幾大都要入波。
菠蘿文：費事同你講，你大把錢亂玩，我係一個死窮鬼，買法國開「細」算數，橫掂近幾場都係開「細」。
侍仔：法國出施丹……真係唔知杜明尼治諗乜，有球場視野都冇用啦，跑得咁慢，出得腳嚟都俾人截咗。法國和波，之後輸埋12碼出局。
菠蘿文：我撐西班牙㗎，佢哋分組賽組織唔錯，踢得/