孫柏文以前係分析員嘅時候，最鍾意嘅嗰種市，就係噚日我哋特區嗰種。個市全日波幅只有一百幾十點，最後升4點，成交量遠比平均成交量低。對於炒家來講，一句講到尾，「悶到嘔」。
不過對於啲好似我咁，收入高低唔靠成交量嘅嗰一種分析員，「悶到嘔」簡直係天堂，因為老闆問：「今日個市有冇特別嘢？」我就可以理直氣壯咁答：「睇牌面就冇，不過股市咁大，冇理由冇事發生，老闆，你都知道我盡忠職守，等我落蘭桂坊happyhour收收風。飲完happyhour之後，向你回報！」所以個市悶，可以絕對話「無風無險，又到10點」（冇辦法，因為我哋特區冇最高工時。仲要如果個市有事發生，分分鐘一、兩點都未收工）。
其實個市睇落去好似風平浪靜，甚至可以話係一池死水，都係因為全球股民喺度靜心等候花旗國聯儲局主席伯南克「發功」。由5月中開始，伯南克同埋佢啲惟恐天下不亂嘅聯儲局同黨，就差唔多日日出來講嘢，挑釁吓大家。
伯南克犯行長天條
到今個禮拜，因為聯儲局開會決定加息之前，要閉關練功，所以就見唔到佢哋出來講嘢，忽然覺得好似天下太平，冇嘢可以做。大家都係耐心等候我哋特區禮拜五凌晨時間，聯儲局開會決定加息之後，伯南克有乜嘢講，先至再參與投機買賣。
嚟緊呢幾日，大家不如專心睇波，「叉」吓電，當個市唔存在算數。因為伯南克一講嘢，大家就要不眠不休去研究究竟「新」嘅息口極限喺邊度。孫柏文希望大家最關注嘅，就係伯南克喺5月中之前，係一個市場覺得非常之「有誠信」，會開印刷機去瘋狂印銀紙，繼續托高股市嘅聯儲局主席。不過，由5月中到𠵱家，佢就話自己變身成為當年用宏觀調控，打壓中國經濟「93年vintage嘅朱鎔基總理」。咁如果佢唔單止加息，仲要話「有排加」，市場都仲會覺得佢係非常之「有誠信」，不過係會篤爆股市嘅聯儲局主席。
但係對於我哋財經口水佬，最有趣嘅發展會係佢忽然由話加息完畢，等大家唔知道究竟佢係「93年朱總理」？還是係「印銀紙局長」？如果大家開始諗呢個問題，咁就要恭喜伯南克，因為到時市場唯一知道嘅係佢完全「冇誠信」。大家可能會問：「有乜咁大不了？」
要知道答案，大家可以問我哋特區嘅任志剛總裁：「做中央銀行行長，乜嘢係天條？侵犯咗就等如死罪？」我相信任總嘅答案一定會係「冇誠信」。因為市場唔信你唔緊要，不過一旦唔信你控制嘅貨幣，就會好大鑊，到時伯南克呢類嘅公僕，亦會踏上下台之路。咁各位醒目fan屎，你話佢會點樣做？
利世民改革公務員體制
講開公僕，噚日下午《利字當頭》一欄總舵主利世民兄打電話畀我，好激動咁問我有冇睇新聞報道話食環署拉小販，有個小販為咗逃離現場跳河死咗。我話有，仲要問佢係唔係因為覺得食環署唔好，所以先至咁激動。佢話：「我咁激動，係因為又有立法會議員話要『檢討』拉小販手法，『檢討』啲乜啊大佬？個小販乖乖地就範，就唔會出事啦！佢哋係唔係話最好就係管理小販嘅職權外判，畀番啲黑社會做，佢哋先至開心？」世民兄果然係我哋特區，數一數二改革公務員體制嘅專家。
孫柏文