市場上因有好多客爭住租大樓面工廈，搞到供應愈嚟愈少，再遲啲都唔知係咪要租幾個細單位打通用至掂。
好似油塘今個月就有4宗逾萬呎工廈租務，涉及面積約6萬呎，聽中原九龍東工商部營業經理伍錦倫講，東源街1號大業織造廠，兩層低層，每層約兩萬呎，先後租出，呎租3蚊；𠵱家冇晒租盤供應。
隔籬東源街21號高力電池大廈B座，最近一樣有兩層獲承租，每層約一萬呎，呎租都係3蚊；𠵱家得番兩層放租。
呢區工廈咁多大手租務，都係因為租金夠平囉，伍錦倫話，附近嘅觀塘區，同類盤源最平都要5蚊，但係大家位置同交通就唔爭太遠。
講開工廈，美聯工商部營業經理羅小媚報料，話葵涌工業街17至21號B室地下，面積10825方呎，由外區客以660萬買咗，呎價610蚊，單位連租約賣，月收約5.5萬，計落回報有10厘。
睇嚟大面積工廈不論租賣都一樣咁好景，唔怪得炒風勁熾熱啦。