冇做港交所主席嘅李業廣，少咗公務纏身，健康狀況果然大有改善，繼前幾日以9秒9極速走後門避傳媒，被封「快閃廣」之後，噚日出席公益金周年大會時，先同傳媒捉迷藏，再以快步急行百米，突圍離場，雖則全程被20幾個記者夾到實，但70高齡有哮喘嘅佢，氣都唔喘一下，仲行得快過後生仔，真係唔講得笑。
坊間盛傳李業廣係證監主席熱門人選，早前只係技術性否認；現時佢俾人問到呢個問題，都封口唔講，咁當事人唔再否認，咪搞到大家有更多嘢諗；所以佢每次現身公眾場合，都被大班傳媒昅到實。
噚日都唔例外，由於佢有走後門前科，所以一眾傳媒索性喺後門擺陣，點知佢今次無即時離場，而係去咗另一間房開董事會，咁大家又轉去會議室門口繼續等。個會一開完，唔少董事都行晒出嚟，惟獨佢遲遲唔現身，原來有人通水，話大班傳媒等緊佢，所以搞到佢左騰右騰，都唔知行前門定後門鬆人好。
終於回應一句
度來度去，李業廣最終由兩個工作人員護航，由前門急步離場，全程一味笑笑口，當被問到「有冇興趣做證監主席」之時，佢老哥終於回應咗一句：「年紀大囉，梗係畀後生做啦！」