小初雖然半夜睇波搞到精神萎靡，無心炒股，但大市持續淡靜，都唔覺得有乜大損失。不過經紀黃話，今個星期五就係半年結，隨時有芬佬出嚟櫥窗粉飾，所以個別芬佬揸重嘅股份，本周或有短暫好表現。
另外，早排向大股東連環收購大陸百貨業務的中國金展（162），昨日在淡市之中急升20％，收0.30元。金展雖然升幅矚目，但成交其實唔算大，只得2061萬股，金額600萬元。
現時零售股選擇多
經紀陳話，金展上次發通告，將按每股不少於32仙，批出3.125億股新股，集資淨額最少港幣9620萬元。如果股份長期潛水，實在唔容易搵人接貨，所以成為金展股價炒上的誘因。
雖然小初唔敢話大陸零售概念已經炒完，但睇番先前好多熱炒零售股如南京金鷹（3308）或者百盛集團（3368），股價同高位比較已回落頗多，由於多咗選擇，所以小初覺得金展如果真係要批股，相信要加多兩錢肉緊。
慕容小初