內地開放後經商發達，做生意又點少得搞關係，所以近年內地公關事業都同樣發展蓬勃。中國國際公共關係協會每兩年一次搞個「中國最佳公共關係案例大賽」，表揚機構喺呢方面嘅卓越表現之外，仲可以畀內地同業向得獎者學吓嘢，因為參選嘅公司包括香港和台灣。
上個周末，佢哋喺北京舉行頒獎典禮，香港恒生銀行同新創建都有獎攞。恒生透過贊助「2005年恒生銀行之少年警訊環保小偵探」比賽攞到金獎；新創建亦因同綠色力量合作搞幼兒環保教育計劃「幼兒綠校網」，喺社區關係組別中攞到銀獎。
要喺98間參賽機構，合共146件參賽案例當中出線，話唔難亦唔易。無獨有偶，恒生同新創建都同樣喺上屆都係分別攞到金同銀獎。