聽電台節目長大嘅讀者，對於由林海峰（Jan）同葛民輝組成嘅軟硬天師一定有情意結。軟硬闊別10年，下個月27號至30號喺紅館開四場「軟硬天師LongTimeNoSee」演唱會，上個禮拜信用卡優先訂票就已經爆晒，外間反應好到不得了。
合作開舖
其實個騷今日先公開賣飛，但阿Jan同阿葛𠵱家無論去到邊，都俾人問「有冇飛呀？」甚至有外籍人士，見到佢兩個都問：「Tickets？When？」加上軟硬身邊嘅好友、同事同埋屋企人都不停叫佢哋訂飛，搞到佢兩個好驚。阿Jan同阿葛惟有跪地向搵佢哋訂飛嘅朋友求饒，叫大家放過佢哋，仲話：「我真係幫唔到大家，你哋今日早啲去排隊買飛啦，如果你哋有訂多咗嘅飛，我哋可唔可以反收購？」另外，軟硬今年會合作開舖頭，賣一啲由佢哋設計嘅服飾。