巴西喺分組賽嘅表現相當不俗，唔止3戰全勝，仲攻入7球只失1球。巴西嘅整體實力有幾勁，相信唔使我多講大家都知，好多球迷都話朗拿度嘅表現未如理想，不過上場對住日本，佢個人梅開二度，仲平咗世界盃入球最多嘅西德前鋒武勒14球紀錄，只要佢保持住狀態，絕對有力打破埋呢個紀錄。
朗拿度破紀錄在望
相反，加納上場2:1擊敗美國，以小組首名出線。事實上，加納能夠贏捷克同美國，晉身16強，其實已經交足晒功課，今場對住5屆世界盃冠軍巴西，輸波亦冇嘢好講，當係吸收經驗，下屆再嚟過囉。
由於16強係淘汰賽性質，巴西今場一定唔會揸流攤。一於博巴西贏兩球以上，揀讓球「主勝」。
法國表現未如理想
另一場西班牙對法國，西班牙係4支3戰全勝嘅球隊之一，佢哋喺分組賽嘅表現認真對辦。上場對住沙地阿拉伯刻意收起大部份主力，等佢哋有足夠時間休息備戰今場賽事。
另外，法國喺分組賽嘅演出就未如理想。對住瑞士同南韓只能夠和波收場，幸好上場擊敗多哥，得以晉級。講真以法國現時嘅表現同狀態，要贏西班牙絕對唔易。我寧願信演出穩定嘅西班牙。揀讓球「主勝」。
陳樹鵬（阿鵬）
有線球彩台主持
電郵：[email protected]