採訪隊推介
聰仔心水：巴西上盤
華度心水：西班牙上盤
今日16強西班牙大戰法國，有呢場都算幾強勁嘅戲碼，或者可以話法國喺16強就要對住西班牙呢隻狂牛，都係法國隊本身喺分組賽只打過半場好波之故。華度認為施丹今仗復出，絕非好事，受讓都唔抵玩。
法國喺最後1輪分組賽對多哥，如果唔係靠韋拉及亨利各入一球贏2:0，分分鐘又好似上屆咁，打3場首圈波已經畢業。隊波表現咁曳，唔少行家都認為係佢哋冇一個好教練領軍，有啲又話太過倚賴已過高峯嘅施丹；華度認同，睇過佢哋對多哥場波之後，更加發覺以現時嘅亨利同施丹嚟講，似乎真係唔可以並存於陣中。
法國出施丹進攻迂迴
對多哥時，進攻由亨利發辦畀列貝利及查斯古特，完全係佢喺阿仙奴嗰隻打法；但之前兩場施丹在陣，前場造波就比較迂迴，見到法國球員好多時都要考慮畀施丹發辦，定係直接餵波上前等亨利發揮。所以呢場16強生死戰，法國有施丹復出，真係要由頭諗過呢班波嘅前景。
相反，西班牙喺3場分組賽攻入8球只失1球，但都唔係順風順水，對突尼西亞時，一班球員就喺華度面前，表現出經得起考驗嘅心理質素，最後反敗為勝贏3:1。呢鋪「讓球」西班牙少讓平/半，上盤可取。
文：華度