世界盃進入最後一輪的16強賽事，頭場由巴西對加納。論實力計，巴西真係贏足幾條街，前鋒朗拿度於上場已顯出其「肥射手」嘅本領，加上實力強大的後備兵源，加納又冇咗最好波嘅中場艾辛，睇嚟90分鐘內贏波完全唔係一個問題。
巴西2:0/3:0波膽落飛
睇番立博嘅大細盤中位數，仲開2.5/3球，某程度上畀咗一個暗示大家，就係呢場波嘅入球數字唔會小，𠵱家亞洲盤保守地讓球半，我謝利就覺得完全冇問題。睇吓立博開嘅波膽賠率，2:0同3:0呢兩個波膽由7.5倍跌到落7倍，係所有波膽賠率中有調整過嘅。我一於捧巴西，讓球盤讓到球半都照去！
經驗豐富未必輸
第2場係西班牙對法國。好得意，呢場波係西班牙讓法國平/半，作為擁有多名超級球星嘅法國隊，認真失威！論表現，西班牙又真係畀到人較大嘅信心，球員年輕，踢法又多變化。相反，法國過份倚重施丹同列貝利，加上法國嘅排陣好奇怪，有「着晒火」嘅查斯古特唔用，偏偏係都要出老人家韋托特！但係西班牙班𡃁仔又贏唔贏到經驗豐富嘅法國呢？睇嚟法國隊應該會「以慢打快」，入球細嘅機會都好高。
立博呢場波開出嚟嘅歐洲賠率，開出西班牙勝2.25倍．和局2.87倍，法國勝3倍，咁啱又係2.87倍嘅和局，我就小注和局啦！
謝利
立博亞洲區首席博彩顧問
精通各大聯賽，分析獨特，文章可見於各大媒體，足球貼士界的一顆新彗星。