今屆世界盃勁吹「熱風」，唔單止8支種籽隊出線16強，連8強頭4個位都係4組嘅首名玩晒，呢勻真係熱門客就笑呵呵，莊家就赤赤痛SayNo！
回憶番近幾屆世盃，今屆嘅淘汰賽戲碼都算係無出其右咁精采，首圈好多人都認為法國係最有機會出局嘅種籽隊，但最後都大難不死，所以造就咗8隊種籽齊齊出線嘅壯觀場面；而且未計星期一嘅意大利同瑞士，之前4場16強都由A、B、C、D組嘅首名球隊拎到，都算熱到燙手咯！
當然，呢個現象其實都係益我哋球迷啫，皆因大家都想睇多啲球星嘅比賽，問世間有幾多人會理加納、烏克蘭佢哋有咩成績吖，最好就場場都係巴西、意大利、阿根廷呢啲勁旅惡鬥先算係「世界盃」嘛，係咪？「熱風」勁吹，捧熱門嘅球迷自然笑到豬頭咁，但係莊家就隨時輸甩褲咯！做賭波嘅就梗係唔想熱門係咁過關啦，最好就爆一兩隊上屆嘅南韓、98年嘅克羅地亞之類，佢哋先有得執嘛！
專家話：今屆8強戲碼吸引
「與過去兩屆決賽周的8強戲碼比較，今屆確實吸引，也令球迷期待，始終強對強，站在球迷角度，已知德國對阿根廷及英格蘭對葡萄牙是不能錯過的大戰。」
Keyman有線足球評述員
網民反應：勁旅玩晒真冇癮
世盃就咁旺熱門隊，外界又鍾唔鍾意呢？「8強是牙買加對多哥你睇唔睇呀？」「撞彩啫，唔代表任何嘢。」「又係勁旅玩晒，咪即係好似香港個樓市一樣咯，冇癮！」
世盃判官歡迎球迷來稿
世盃判官係1個世界盃期間專為廣大球迷而設嘅欄目，球迷如對賽事有任何投訴、意見，想同我哋分享，就快啲投稿啦！來稿勿過300字。
世盃判官體育版電郵：[email protected]
體育版傳真熱線：23703534