好多人都知賓卡愛高球，所以連QDII都懶理；但係世界盃打得如火如荼，仲要係四年一次，唔少賓卡點都會睇番幾場，最多咪又俾特首窒。好似恒生柯清輝同埋花旗陳子政（TC），前者愛南美球隊，巴西阿根廷都係心頭好；後者專登校好鬧鐘，捱夜睇波都冇計，足球嘅吸引力有幾大？唔使華華多講。
TC話，公司有同事專登放兩個星期假睇波，狂熱啲嘅直頭飛去歐洲，佢自己冇假放，惟有揀波睇，平日就睇頭場，遇着荷蘭、德國、英格蘭、巴西呢啲大賽，先會深夜爬起身睇，事關朝早要返工，唔可以好似啲放假嘅同事咁，晚晚睇天光。
撐南美球隊嘅柯大俠，講到明唔刻意追波睇，但好記得阿根廷大戰墨西哥嗰場，要加時先分到勝負。咁多球星之中，佢最愛就係美斯，家吓最期待巴西可以喺四強對英格蘭，睇好邊隊？梗係巴西啦！