李家二少澤楷賣資產益小股東呢套連續劇，不知不覺已踏入第8日，劇情雖然暫時放慢咗少少，但都仲係日日有新進展。據聞最新進展係，響溫總理出訪完非洲返到中南海之後，阿爺嘅決定，係叫二少自己搞番掂咁話。
而可能呢兩日有酷熱天氣警告，所以條街真係冇咩「風」，嗰批「接近主席消息人士」、「李澤楷身邊人士」同埋「接近交易人士」可能全部都要唞暑！不過，咁對二少嚟講真係一個好消息，件事好話唔好聽，已經唔能夠返轉頭，啲有心人如果肯收聲，真係可以當幫忙喇。
呢個時候見傳媒?
之不過咁，雖然阿媽8號仔上下一早經已封口，但阿仔勇過二少，夠膽響呢個風高浪急嘅日子蒲頭，呢位仁兄就係SUNDAY新掌門人史東（IanStone）！聞說史東兄噚日正式搬入新office開張大吉，但唔知點解咁急不及待，今日就話要開個飯局見吓傳媒，話講吓3GMobileTV……你估班行家會唔會淨係畀佢講呢樣嘢呢又？
華華都幾敢肯定，聽日見報，大家就會話繼上個星期袁天凡同陳禎祥入電視城之後，二少又再搵人轉移視線囉！
李華華