德國城巿多蒙特嘅足球氣氛特別好，相信同佢哋嘅球隊有關，多蒙特喺德甲歷史悠久，又拎過德甲冠軍，又拎過歐冠盃冠軍，自己個城市嘅球隊咁好成績，巿民好自然都會變成球迷一分子。
有線直擊隊噚日喺多蒙特球迷廣場，見證德國以2:0淘汰瑞典晉級8強精采時刻。多蒙特呢個球迷廣場唔算好大，據官方資料顯示，廣場最多只可以容納3萬球迷左右。大戰下午5點先開始，但熱情嘅德國擁躉朝早10點已經開始陸續入場，真係人山人海。
向隅遊人妙計睇波
大約3點到，廣場工作人員突然宣布，場內嘅入數已達到頂峯3萬，未能入場嘅球迷惟有喺廣場外搵地方為國家隊打氣啦。呢班入唔到場嘅球迷都幾有辦法，有啲選擇爬樹、有啲騎膊馬、有啲上車頂睇，總之搵個位置居高臨下，咁廣場大電視就可以一覽無遺啦。
平時去酒吧睇波，幾十人柴娃娃已經好高興，今次3萬人一齊睇波，氣氛更加冇得彈。尤其德國入波後，球迷瘋狂係咁跳，真係有啲感覺到輕微地震。當德國領先2:0後，fans嘅情緒已經無法控制，唱歌、跳舞、狂飲啤酒，狂歡party正式開始！
果然，party喺比賽結束後兩個鐘頭都未結束，直至阿根廷對墨西哥開波，班德國躉依然故我享受，氣氛簡直比香港個7人欖球賽更為瘋狂。球迷全日叫得最多嘅口號，經初步統計應該係：「超級、超級、德國超級」同埋「柏林、柏林、決賽再見」兩款。
有線06世界盃嘉年華，將於今晚9:00pm——11:00pm，播出世盃外景隊採訪滙報