呢排滙豐不斷對外發表調查報告，一時話每月要儲成萬蚊先至夠退休，一時又話人口老化係大勢所趨，講到底，無非都係為佢哋嘅財富退休產品造勢。
華華見到佢哋保險集團行政總裁蔡中虎，索性開門見山，問佢會有乜新產品推出？佢開頭都扭扭擰擰唔肯講，問多兩問先爆料，話嚟緊會推出一個退休後嘅醫療保險計劃，但詳情要遲啲先公布。
跟住蔡中虎同華華講到睇波，佢話，世界盃期間都有啲員工專登請假睇波，但對業務冇乜影響，佢都有睇埋一份，但就好揀擇，深夜嗰啲唔睇，兩隊Level相差太遠嘅唔吼，咁擺明海軍鬥水兵嘅賽事，都唔使預佢。
之不過，到賽事踏入16強之後，唔理場波幾多點，佢都一定會捧場，尤其係巴西隊出賽，就更加唔會錯過。