黃伊汶（Emme）自03年與余文樂傳出緋聞後，雖然一直否認戀情，但二人經常出雙入對，今年初更被目睹在花都浪漫。正當全世界以為余黃戀打風打唔甩之際，本報卻發現Emme偷會陳冠希御用唱片監製陳奐仁，並穿上超低胸上衣與對方到深水灣沖浪及撐枱腳，大晒34C上圍。
最近甚少見報的黃伊汶，近年一直與余文樂低調拍拖，但上周五下午約4時她卻與新加坡音樂人陳奐仁雙雙現身深水灣露天茶座，由於陳奐仁過往多是為陳冠希、梁詠琪和林海峰等人監製唱片或作曲編曲，在音樂上從未試過與Emme合作，故二人今次密會，起初會令人聯想到二人稍後或會合作新歌，但實情似是另一回事。
赤裸上身
大片豬腩肉任睇
現場所見，Emme與陳奐仁均是一身涼快打扮，根本不似是音樂交流，只穿短褲的陳奐仁赤裸上身，露出大片豬腩肉，而穿上牛仔短裙和黃色超低胸上衣的Emme，則展露出一雙修長美腿和34C豐滿上圍，教身旁的陳奐仁噴鼻血。雖然Emme以往出席公開活動時經常賣弄性感，但只限於露腰露腿，絕少機會見她拋胸，今次她肯賣大包以低胸打扮與陳奐仁約會，二人關係想必非比尋常。據估計，二人該是在深水灣玩完wakeboard後，到露天茶座稍作休息。
未知是否要藏拙的關係，陳奐仁進入茶座後，很快便穿上一件紅色T恤，把自己凸得十分趣致的豬腩肉收起，跟Emme分別點了凍飲後，便面對面坐下來談心。
玩完一輪劇烈運動的Emme，不時垂着頭飲汽水，看來有點疲倦。相反，坐在她對面的陳奐仁仍然精力十足，不時手指指談論那些正在海面上玩wakeboard的人，不知是否因身材惹火的Emme頻頻放電令他熱血沸騰，難耐對方火熱誘惑，二人在露天茶座逗留約半小時後，陳奐仁便登上Emme的保母車一起離開。不知余文樂得知此事會作何感想？
空肚上船
嘔吐後陪伴搵食
記者昨日致電Emme詢問她與陳奐仁到深水灣約會一事，其助手Jenny回應說：「Emme嗰日係約咗陳奐仁滑水，但唔止佢哋兩個㗎，谷德昭都有去，仲有成班朋友，其實本來都有叫埋我去，但我唔得閒冇去到。」記者指現場只見到黃伊汶和陳奐仁撐枱腳時，Jenny說：「佢（指Emme）嗰日嘔呀，可能空肚啦，一上船就嘔，所以想食啲嘢，咁咪搵咗陳奐仁陪佢囉，佢哋識咗好多年，喺做嘢啲場合識嘅，之後有約埋一齊玩，佢哋係好朋友關係。」
採訪、攝影：娛樂突發組
