陽光普照，噚日去沙灘騷「哥利」，返到屋企，將泳衣浸喺洗手盆，再用洗衣機洗沙灘毛巾，之後發現成地水！死啦，係洗衣機去水喉漏水，定係洗手盆呢？:|
大家睇呢個Blog咁耐，都估到我又打電話畀專家朋友啦，嘻！阿朱喺建科測試儀器做技術顧問，佢話請專人嚟好貴，佢私人醒我自創嘅方法，十幾蚊搞掂。
佢話，市面大部份洗衣液都含有機酵素，有機酵素喺紫外光底下，會變成藍色，而十幾廿蚊部嘅照銀紙機，都會發出紫外光。所以，倒啲洗衣液落水管，之後用照銀紙機照吓水管表面，如果見到藍色水迹，即係有漏水啦。佢仲話，食環署𠵱家用色粉測試，但呢啲色粉可能會整污糟喉管、牆身；有啲專家就用外國入口嘅螢光粉，但一支成千蚊㗎。
我即刻倒啲洗衣液落去洗衣機去水喉同洗手盆，然後用照銀紙機照，原來「罪魁禍首」係去水喉呀！:P
阿朱仲教我，見到廁所天花有水迹，懷疑係樓上去水喉漏水，可以叫樓上鄰居倒啲洗衣液落去水位，而你就喺樓下照，睇吓有無藍色，就知係咪樓上水喉破裂，啲水滲到落嚟囉。若果懷疑簷篷漏水，可以照辦煮碗，將洗衣液滿布成個簷篷，但要浸泡24小時先喺簷篷下面照，睇有無裂痕漏水。
聽到呢度，我忍唔住問阿朱：「你教人用呢啲咁平嘅方法，咁你咪無生意囉。」佢笑笑口咁話：「驗完咪又係要我哋出手。」咁又係，但我就唔使，因為自己換條喉咪得囉，哈哈。:D
逄周一刊出