出得嚟做行街Sales，真係點都要有部O2mini，一來係行頭嘢，更重要係手機、PPC二合一，一機在手做乜都得！年半前入貨，初頭都相安無事，直至一個好「寧靜」嘅早上，咁就出事嘞！
話說嗰朝開咗半日工，一個電話都冇、老細又冇打嚟找我麻煩，感覺有如白𢭃人工！中午施施然返到公司，同事話老細搵我成朝，出事！細看手中O2mini，開關Programs又影相都冇問題，但打出打入電話……唔得，熄機再開，竟然有十幾個留言！
原來部機有「隱性」Hang機問題，簡單講每當程式開得太多，就會Hang咗喺度，PPC嗰部份完全冇問題、計數機照計、日程亦任你睇，不過手機嗰邊就完全唔可以打出打入，俾佢呃晒！
新機落地時大概1星期Hang1次，但𠵱家變咗做「老相好」！1星期點都有2、3次！曾經入廠2次換「底板」，情況都係冇乜改善！解決方法係得閒試按電話號碼，㩒到即係冇Hang啦！㩒唔到就即刻要Reboot嘞！
點解到𠵱家都唔換機？講樣講功能，真係冇機好過佢呢！最近都有諗部新版O2Atom，有行家用緊話完全冇以上鑊氣，不過我部mini𠵱家放得嗰千八，要補成四千差價、加埋兩部機硬件規格差唔多，只係個OS升級咗，好似又肉赤咗啲啫！
記者、攝影：朱崇德
