大企業財雄勢大，唔講其他，淨係培訓都成team人負責，由年頭到年尾，啲乜乜物物員工培訓計劃一籮籮，中小企真係拍馬都追唔上，所以每年由香港管理專業協會（管協）搞嘅最佳培訓管理比賽，啲獎項都係一眾大企業嘅囊中物。
華華收到管協發出嘅「2006年最佳管理培訓獎」得獎名單，攞獎嘅香格里拉集團、滙豐銀行、馬會、恒生、朗豪酒店、中電、深灣遊艇俱樂部、金門建築、仲量聯行及信興電器，清一色都係水頭充足嘅大公司，當中唔少仲係攞兩個以上嘅獎項。
管協話，自從舊年增加咗個人獎項之後，唔少企業都提名自己嘅員工參賽，今年呢兩個大獎都落咗喺酒店業嘅員工身上，分別係香格里拉任月明，同埋朗豪何錦漢，有咁醒目嘅下屬，佢兩位嘅老闆真係飲得杯落。