瑞典上周六於16強被主辦國德國以2:0擊倒，前鋒老將軒歷拿臣（簡稱拿臣）更喺53分鐘12碼宴客，認真慘情，佢喺60分鐘更怒踢梅斯達嘅球鞋洩憤！
拿臣出道至今，備受球壇內外尊重，喺巴塞亦間接協助球隊拎到雙料冠軍，可惜國家隊唔爭氣，一直處於青黃不接嘅艱難時期。雖然瑞典喺B組以次名出線，但面對主辦國德國就被技術性擊倒，而且拿臣更射失12碼，令球隊連最後可以食住啖氣反撲嘅機會都冇埋，都算臨尾香咯！
其實，瑞典教練拉格碧應該要諗吓用多啲新人，皆因成隊波個陣容都打咗兩個大賽，𠵱家拿臣隨時退出國家隊，前面就剩低狀態低沉嘅伊巴謙莫域同「大嚿飯」柯碧克，點解成個世界盃都冇諗吓用阿積士個前鋒羅辛貝治試吓呢？
做人當然要放眼將來，瑞典世盃畢業，歐國盃外圍賽又殺到，如果仲係得呢班人嘅話，「北歐希望」瑞典就真係會跌入黑暗期，而北歐足球亦會隨之而沒落！噢，可惜！
判官話
拿臣咁㷫都有道理嘅，話晒自己都打過94世盃4強嘛，𠵱家睇國家隊愈來愈唔掂，惟有踢人哋對波鞋嚟「出火」！
可憐指數：★★★★★
5★為最多
專家話：瑞典缺射手拿臣頂硬上
「目前瑞典國家正處於青黃不接期，這從今屆決賽周前線仍重用軒歷拿臣、柯碧克及伊巴謙莫域3名前鋒，當中後前兩者已年過33歲，明顯地沒有質素的年輕球員接班，如軒歷拿臣留隊領軍出戰歐國盃外圍賽也無可厚非。」
（有線足球評述員丘建威）
網民反應：踢波鞋好小事
外界對軒歷拿臣是次怒行有何反應呢？「又唔係踢人，好小事啫。」「我支持瑞典，唔使咁悲觀喎！」「拿臣嚟香港踢波就好喇，起碼唔會踢球證嘛！」
世盃判官歡迎球迷來稿
盃判官係1個世界盃期間專為廣大球迷而設嘅欄目，球迷如對賽事有任何投訴、意見，想同我哋分享，就快啲投稿啦!來稿勿過300字。
世盃判官體育版電郵：[email protected]
體育版傳真熱線：23703534