第1次打世界盃，就可以入16強！澳洲隊可唔可以再創神話？落場嘅11位球員再加埋軒迪克，真係無嘢係唔可以發生！
澳洲今晚對意大利可以點踢先有機會呢？我就有以下幾個建議：第1：靠死球戰術，澳洲班球員個個大大隻，學番上場對克羅地亞咁，一有死球，就好似打欖球咁一擁而上，製造混亂，隨時有收穫！第2：打「9-0-1」戰術，死守，玩埋加時，迫和意大利射12碼，又隨時可以搞掂意大利！第3：英超踢法，只要行軍迅速，兩邊落底傳中必有「士哥」。
至於意大利，雖然贏咗加納同捷克，我諗好難有說服力！前者係新丁無經驗，後者受傷兵以及年紀問題困擾；意大利贏波，我唔服！
意軍踢法沉悶
本來以為有基拿甸奴同東尼在陣，可以一改意大利咁沉悶嘅踢法。可惜，意大利我認為都仲係無乜起色！佢憑乜嘢讓澳洲一球呢！
所以我覺得澳洲可以守和意大利！仲有，上屆世盃軒迪克帶領南韓搞掂意大利，呢位機關算盡嘅教練，深知意大利強項同弱點，我對佢好有信心！另外，意大利搞掂咗捷克，我當然支持仇人嘅對手，澳洲啦！
周鵬
商業一台《長傳急攻一粒鐘》主持
今晚播放時間，晚上8:00pm-9:00pm