德國揸法拉利好feel
法拉利相信係好多人嘅Dreamcar，不過，香港路窄車多，就算有錢買佢返嚟，都冇乜機會完全發揮架車嘅威力，有時3波未到已經要收油，好嘥料。德國呢邊就唔同，部份高速公路無時速限制，你可以揸住架法拉利，隨時開到時速300公里。最好就係呢度嘅公路又長又直，開到咁快都唔會太危險，香港嘅法拉利車主，係咪好羨慕呢。
李勇明
曾採訪世界盃、歐洲國家盃、奧運、亞運等大賽，身經百戰。
地鐵火車冇人查飛
在德國每日搭火車、地鐵的次數，大大話話冇100次都有50次，但除了長途火車一定有人查飛外；平時搭市內地鐵或火車，很少人會查飛，亦好少碰到票務員巡車。曾想過逃票（1日乘車票約5至8歐元，不同市區不同票價）。但還是不敢，每次看到這個在車上的警告牌，話到明被查到沒票的話，要罰款40歐元。
徐嘉華
採訪過無數大賽，最鍾意捐窿捐罅搵題材，今次德國之行啱晒我。
Jose斷腳？慘！
見到圖中嗰對「斷腳」嗎？大家都應該從電視廣告中見過呢位拉丁小朋友。話說贊助商為呢位廣告中叫「Jose」嘅小朋友，整咗個模型公仔，豎立喺科隆火車站門口，指住天花上一眾球星巨畫，栩栩如生。點知分組賽英格蘭對瑞典賽後，唔知邊個球迷將個模型公仔扯咗落嚟，得番對「斷腳」。筆者幾日後重遊此地，仍然未修葺好，真係戥「佢」可憐。
朱冠恆
肩負現場直擊畀料重任，無論你當我名家抑或明燈，都希望交到功課。
