近排大市升一陣又跌一陣，成交愈嚟愈細。上周電訊盈科（008）賣資產單新聞，總算為沉悶大市帶來一陣刺激，否則港股將更加悶，小初一班經紀老友都話，起碼要打完世界盃，大市先至會有番多少睇頭。
不過經紀黃話，有個別好股因為太超賣，不妨留意走勢，伺機博反彈，其中向來多芬佬推介的理文造紙（2314），今日公布全年業績，分析員早前估計，理文盈利起碼升4至5成。
理文造紙近期受大市氣氛影響，股價由13元樓上一路跌落嚟，現價同分析員定下的目標價比較，起碼有20％的折讓，如果今次公布嘅業績對辦，應對股價有一定刺激。
理文造紙早排一度被質落至10.40元低位，上周五反彈至11.50元。另外，同行的玖龍造紙（2689）亦由接近7元被質落至6元樓下，上周五微升唔夠1％，收5.85元，如果理文造紙業績對辦，唔排除玖龍都可以齊齊反彈。
慕容小初