港股由低位15200水平回升，中期調整是否到底，仍須觀察多幾日，特別係呢個禮拜期指結算，市場會較為波動，但若恒指能企穩在10日線（15605）同20日線（15710）之上，則唔排除大市有形成複式頭肩底的可能性。
未來的一兩個禮拜，大市若能在16000大關以下整固或會再破位而上（現時100日線為15976），則中期調整便有好大機會到底，以量度升幅計，後市可重上16800，亦即下跌裂口（16846至16674）可以回補。
銀建國際（171）落到2元水平，整固成個月，打好底。以半隻金融股來衡量，股價實在已好吸引。銀建今年高價2.825元，家吓跌幅達3成，往績PE4.88倍，雖然05年（12月年結）的盈利有「水份」，但06年保守計PE亦只係6倍，若大市升浪再起，銀建亦可望重上2.60元水平，有機會賺3成。
沽建行賺過億
銀建除轉型處理不良資產，賺取可觀佣金外，在「自己友」的投資上亦好有成績，近期就趁高價出售所持的建行（939）而換馬至中行（3988），中行揸佢1年半載，相信賺10至20%冇問題，而賣咗建行過億股，就已經賺咗億幾銀落袋。
銀建去年獲利7.24億元，大升79%，每股盈利41.5仙，升60%，盈利大增，主要係物業增值1.49億元，及可換股債券按公平值處理帶來收益近2億元。06年，由於有沽售建行賺過億銀入賬，同時，處理「資產包」業務會加快進行，收益亦會增加，估計全年盈利約6億元，減少17%，每股盈利33.4仙，以8倍PE計，目標價係2.675元。
銀建兩大股東俱「響噹噹」，Catic係中國國務院屬下信達資產管理的全資附屬，早輪行使CB，增持1億股後，現時持有24.43%權益；第2大股東美國花旗集團持9.64%；另外銀建控股最近增持1500股後，持股量上升到7.82%。Catic行使CB認股價2.20元，銀建控股購入平均價係2.375元。
銀建同花旗已組成合營公司，計劃大舉接做4大資產處理公司的「資產包」，消息指有一個Size達600億元的「資產包」好快會搞掂，相信對股價會有刺激。
郭兆誠