哪有貓兒不吃腥？不過唔愛「腥」嘅Maggie，養咗小黑貓MiuMiu後，由愛貓、再愛魚，都可算愛得情癡！清蒸、香煎太普通又寡口？魚！其實千變萬化㗎，等貓癡Maggie煮番幾個外省/外地風味魚菜式大家學吓嘢，加入香、辣、酸、鹹、甜等味道調劑，魚嘅腥味早就去得不知所終！煮嘅時候，佢的貓咪都圍住廚房等食，拎到出嚟仲想偷食，喂！貓仔你食過我仲有得食？行開我要試食。
記者︰劉昱蘭
攝影︰何家亮
示範︰屯門讀者Maggie
蕉葉防水保味鮮
價錢︰$28/3人
需時︰20分鐘
以芭蕉葉及指天椒入餚，充滿東南亞風味。以芭蕉葉包裹着魚來蒸，不但令肉身散發着獨特香味，仲能避免蒸魚的倒汗水，沖淡了魚肉的鮮味，果然想得周到。
材料：
鯧魚1條、芭蕉葉2塊、鹽少許、檸檬半個（榨汁）、葱花適量、豉油1湯匙、油1茶匙、指天椒數條（隨意）
鯧魚$18/1條（a）
檸檬$4/4個（c）
指天椒$3.5/1包（c）
簡易法
1.魚去內臟洗淨，芭蕉葉、葱、指天椒洗淨；葱切成絲；
2.以芭蕉葉將整條魚包起，放進鹽及指天椒，兩邊以牙籤封口，放碟上以大滾水隔水蒸約15分鐘。
3.豉油、檸檬汁、葱花、油一起煮滾，淋上魚面即成。
貼士：
若唔食得辣，指天椒可以不加。若想要辣啲，可以切碎啲指天椒嚟蒸，就更入味。
先煎後燜脆夾嫩
價錢︰$20/4人
需時︰20分鐘
潮汕式煮魚，「先煎」將嫩肉封實脆皮內，「再燜」引出魚肉嘅甜味；係多咗一重功夫，不過鮮、嫩、脆口魚肉，再加潮汕鹹菜風味，冇得頂！
材料︰
福壽魚一條約500克、潮汕鹹菜半包、葱3根、薑4片、油適量、生粉適量、鹽適量、水適量
福壽魚$12/1條（a）
潮汕鹹菜$4/250克（b）
葱$1/1紮（a）
簡易法
1.鹹菜洗淨切絲；葱切段；魚洗淨後抹鹽腌10分鐘；
2.落油起鑊，魚煎至金黃色，放入葱、薑，然後放鹹菜及適量水，燜10分鐘埋芡即成。
貼士︰
醃魚時想入味啲，記得在魚身兩面「橫𠝹」兩三下，然後才抹鹽。
魚汁醒胃當湯飲
價錢︰$23/4人
需時︰20分鐘
Maggie喺雲南餐廳食過酸湯魚，一鍋連爐上、熱住食，愈煮愈酸勁開胃，想要多啲湯汁當湯飲吓、撈吓飯？隨意埋少啲芡就得！
材料︰
鯇魚肉12両、番茄兩個、酸菜半包、薑3片、辣椒半條、醋2湯匙、醬油1湯匙
鯇魚$16.8/1斤（b）
番茄$7/1斤（c）
酸菜$10/1斤（a）
簡易法
1.材料洗淨，辣椒切碎，落油起鑊爆香薑片和辣椒；
2.番茄切片，酸菜切絲，落鑊加水煮開至番茄軟身後，加醬油及醋，然後落魚片煮熟即可。
貼士︰
可先用胡椒粉及麻油處理吓條魚，冇咁腥又香啲好食啲。
水蛋撈魚 滑不留口
價錢︰$42/4人
需時︰20分鐘
先將魚肉打爛混入水蛋一齊蒸，入嘴已是滑不留口，再加點點酒、火腿、瑤柱、芫荽吊味，入口嫩滑又醒胃。
材料︰
鱲魚約480克、雞蛋4隻、火腿1塊、瑤柱茸1湯匙、芫荽1棵、鹽1/2茶匙、酒1茶匙、上湯1/2杯、胡椒粉少許
鱲魚$1.8/1両（a）
瑤柱$398/1斤（a）
芫荽$2/1千克（c）
簡易法
1.魚切下頭、尾、魚身隔水蒸，魚身起肉切碎；
2.蛋打散，加入鹽、酒、上湯、胡椒粉及魚肉碎拌勻蒸；
3.火腿、瑤柱、芫荽切碎，魚頭、尾放在兩邊，中間放火腿茸、瑤柱茸、芫荽碎即成。
貼士：
蒸水蛋過火會變老、唔熟又會變水；只要插支牙籤，企得穩就即係熟！
鮮甜魚湯 渣都食埋
價錢︰$75/4人
需時︰15分鐘（未計煲湯時間）
呢個湯唔單止啱人飲，連貓仔都可以吃上一口；粟米加大眼雞，已經鮮甜到唔使點落調味料，由於夠「清」，所以MiuMiu就最鍾意食佢啲魚肉湯渣（不過要先去骨才肯食），如果屋企都有養貓，不妨試吓！
材料︰
大眼雞魚兩條、紅蘿蔔1條、粟米2條、豬𦟌$25、鹽少量、水6大湯碗
大眼雞$28/1斤（b）
紅蘿蔔$9/1斤（a）
豬𦟌$28/1斤（b）
簡易法
1.材料洗淨，切好紅蘿蔔，魚略煎；
2.所有材料入鍋，加入水煲2小時左右即可。
貼士︰
唔想條魚出水就要畀啲心機煎吓佢。
（a）土瓜灣街市
（b）欣榮花園華潤萬家
（c）土瓜灣道66號惠康超級市場
註：以上價錢以6月25日為準