好多人都同華度講，意大利今屆世界盃有「打假波」之嫌，相信都係同佢哋對住美國嗰場，孭重飛之下只能夠打和對手累街坊有關。呢日意大利就喺16強對住「袋鼠國」澳洲，相信大家可以暫時撇開呢個「人為因素」，再捧意大利場。
澳洲同美國都有啲共通點，就係大家都唔係球壇傳統勁旅，但近年水準就穩步上升；不過，今屆亞洲球隊首圈全軍盡墨、非洲5隊亦只有加納1隊出到線，始終喺歐洲踢嘅世界盃，都係有利自己地頭嘅歐洲球隊。
有本錢先失分畀美國
華度淨係識馬龍白蘭度、阿爾柏仙奴等做嘅《教父》系列電影，真正嘅黑手黨員一個都唔識，所以無法就意大利賭波呢樣嘢作定論。
但問過一啲歐洲球迷，普遍結論都係話意大利其實有本錢打和美國「收錢」。因為分組賽拎到6分已可謂首名出線在望，當時意大利的確需要首名出線，以免16強就遇上巴西；但咁啱對美國嗰場未踢之前，見到同組最強對手捷克輸畀加納，形勢上又真係有權揸流攤。
但現時唔係分組賽，係1場決勝負嘅淘汰賽，90分鐘內打和要踢多30分鐘加時戰。相信意大利佬咁識計數，唔會咁早就玩加時，浪費自己班球員嘅體能啩？穩穩陣陣博個意大利單Ｗ啦。文：華度
採訪隊推介
華度心水：意大利勝