昨日天氣悶熱，但係無損一眾政府高官嘅心情，佢哋喺唐英年司長帶領下，入咗沙田馬場捧夏佳理主席場，睇「香港賽馬會社群盃」賽。何志平局長、周一嶽局長同李淑儀常秘齊齊出現JCBox，仲有大班NGO代表，認真熱鬧。
社群盃第八場跑，之前嘅第六場，許仕仁司長隻「有聲有色」，響見習生王志偉胯下爆42倍巨型冷門，肥龍同許太笑到見牙唔見眼，淨係獎金都超過三十萬，賽後佢請埋唐唐夫婦以及立法會秘書長馮載祥伉儷一齊拉頭馬happy吓。唐唐亦好高興，佢仲問八方有冇瞓身。唐唐可能真係買重老友隻馬，因為有人見到佢去counter收咗一大叠金牛。肥龍咁旺，下次記得真係要瞓身買重注咯。
肥龍自己就話，響咁悶熱嘅環境下，見到愛駒win咗，總算可以調劑一吓心情。呢隻馬今季win咗兩場，當年係簡炳墀幫手買番嚟，簡sir退休之後，由佢徒弟葉楚航接手訓練；肥龍話愛駒早前出賽時，俾一匹儀仗馬踢傷，休息咗四個月，葉楚航能夠醫番好隻馬已經相當難得，今季仲贏咗兩W，當然滿意。
肥龍仲話賽前對「有聲有色」信心唔大，只係叫班老友買位置（相信有唔少「受害者」），估唔到贏得咁輕鬆，令佢好詫異喎！下季佢會同唐唐夾份養一隻馬，家陣仲物色緊，希望蔡約翰幫佢哋揀隻好馬番嚟贏大賽；自己亦會養多隻新馬，兩隻馬都打算交畀蔡約翰訓練。
許太唔撐老公留任
唐唐肥龍呢對配搭咁啱key，唔知馬場之外，在官場有冇機會再合作呢？唐唐對八方話一切由煲呔定奪，要特首邀請先有得做㗎；至於預先張揚話只做兩年嘅肥龍就好大聲咁話：「唔做囉」，但係有人想你做落去又點呢？佢反應好快咁話：「都有人想我唔做。」邊個呢？「咪係想做我個位嗰啲人。」
肥龍喺沙圈內一邊睇馬，一邊答八方政治問題，唔知有冇影響佢落注。許太就態度明確得多，一聽到話有人想肥龍留任，佢即時舉手：「我第一個反對。」佢話自從做咗呢份工，肥龍晚晚都要睇文件，冇得休息，連眼鏡都唔啱度數要配過新嘅，又真係幾慘情。
許太唔捨得老公咁辛苦，但係北京搵唔到適合人選點辦呢？身兼行會成員嘅夏佳理主席就話，梗係最好肥龍肯留任啦，不過，最後要佢老哥自己點頭。論特區人事，夏主席最有資格，因為舊年都係佢第一個話肥龍係最佳CS人選，結果真係順利跑出，仲輕鬆過隻「有聲有色」。夏叔八月退任馬會主席，不過，佢啲心水馬仍好準確，買咗幾場冷馬都收錢，反而周一嶽啲貼士就麻麻哋，佢俾啲禽流感搞到成頭煙，好耐都冇刨馬經，所以唔怪得佢。
傳真︰2623-9278
電郵︰[email protected]
