港股1周埋單，算係有驚無險。恒指跌33點，H指跌73點，紅指跌8點。外圍方面，日股過山車式變化後，1周仍升244點，杜指則只微跌25點。
全球股市可能已對美國好大機會加息作咗反應，再急挫機會唔大，反反覆覆機會較大。炒輪策略，係見股價回軟買C輪。
滙控C輪4497：滙控（005）上周最高135.70元，最低133.50元，高低位2.20元，收134.80元，1周跌0.80元。等輕微回落，買C輪，對象係4497。
4497喺8月尾夠鐘，溢價2.1%，槓桿率36.4倍（有效19.8倍），引伸波幅14.9%，數據唔錯。兩個月後正股如果見番上月142.40元，隻輪值85仙。
滙控C輪4956，壽命比4497長1個月，交投活躍，數據亦唔錯，啱短炒。
港交所C輪4684：港交所（388）買賣單位由2000股改為500股，今日生效，趁機買啲C輪，4684比較實際。隻輪11月中到期，輪價77仙，溢價5.7%，槓桿率6倍（有效4.3倍），引伸波幅43.1%。
港交所熱門C輪3722，10月夠鐘，有效槓桿率6倍，引伸波幅高到53%，溢價高到31.5%，現價21.8仙，輸死好多人。咁嘅條件，買落去，瓜多過菜。
章盛