踢波身體好，踢波無煩惱。陳仲謀常呼籲大家踢波，在球場又跑又喊，與隊友攬頭攬頸，最適合身子弱兼有壓力的都市人。其實他在年少時差點做了職業球員，後來轉軚讀醫，當上精神科醫生。但他對足球的狂熱不減，現在更是醫學會足球隊隊長，堅持挺着肚腩在球場追波。世界盃又來了，他家裏七百呎的睇波影院大派用場，一到大賽，又要調校鬧鐘半夜起床睇波，「第二日都要返工，唔使做咩！」
「巴西不嬲都咁好，無辦法唔睇。」70年代球王比利訪港，全城沸騰，陳仲謀也在發球星夢。他指出由於父親是警察，自己15歲加入警察球隊踢香港青年軍賽事，做隊長領導比他大幾歲的師兄，「好架勢，以為自己好威水」。同年高級青年盃決賽，警察對愉園，他與陳發枝（後來當上足球先生）硬碰，兩人同時跳起頂頭槌，結果對方頂贏了，最後警察隊屈居亞軍，才知自己技不如人，「我高過佢，但係佢跳得快過我。後來先知，（外籍）教練揀我做隊長，唔係因為我好波，其實係我英文好，方便溝通。」
自此他收拾心情努力讀書，在港大讀醫，也為利瑪竇舍堂球隊效力，踢足五年，「運動同讀書無關係，打完波，個腦仲好。」每逢ChampionDay就有女藝人做頒獎嘉賓，印象最深刻是曾和港姐朱玲玲握手。有一年大賽前膝頭痛，硬着頭皮到瑪麗醫院找師兄用針筒抽走關節積水，「痛到跳舞！𠵱家我做咗醫生，就會建議呢個病人唔好踢！」
陳仲謀是半個波友、也是半個醫生，家人卻與足球保持距離。家中睇波影院雖然裝上隔音板和100吋Plasma螢幕，但經常不能對外開放，因對足球沒興趣的太太會「詐型」；20多歲的女兒也不愛足球，「佢同老婆都係好文靜…都好嘅，女仔踢波隻腳會好粗！」
本報記者
逢周一刊出