世界盃期間，唔少球迷嘅老婆女友都怨聲四起，話另一半畀個波搶咗去，同時，全城生態都受到影響，例如的士司機喺打波期間冇晒客，冇電視睇嘅夜市生意都拍烏蠅，好彩啲商場一早部署好，裝晒電視直播，等啲人嚟睇波，結果搶番唔少人流，旺角郎豪坊揸弗人李澄明都有俾人搶客嘅煩惱。
但係佢就話自己好好彩，睇波太太唔單止冇投訴，仲非常識做，每晚一到開波時間，就會自動自覺起身入房，將客廳部電視機嘅控制權，移交畀佢，等佢可以睇餐飽。
咦！唔聲唔聲，會唔會係無聲抗議呢又？佢笑笑口話，梗唔係啦，太太只係入房煲劇集，大家各有所好！
45分鐘睇完一場
晚晚幾場波，第日仲要返工，咁點算？李澄明話，只會睇頭場，深宵嗰場就會錄起，到第二朝早6點起身，為免知道賽果，佢唔聽電視電台新聞，先用快速搜畫去睇番場波，通常45分鐘左右可以睇晒全場。咁就唔使捱眼瞓，又睇到場波，跟住先返工。
佢話自己中學時期都有踢波，家吓想踢都冇氣囉，所以齋睇就算啦。至於今屆人人捧巴西，佢就覺得阿根廷、西班牙同埋意大利贏面大啲喇。
李華華
讀者如有任何意見或報料，歡迎發送電郵至[email protected]。