成龍前晚喺南京出席一個為南京老人院重建嘅慈善活動，一向見慣大場面嘅佢，當晚竟然被一個男fans嘅熱情舉動嚇親。事緣成龍喺台上表演時突然有一名四眼男fans衝咗上台，見到偶像鬼咁興奮，即時上前熊抱兼強吻成龍。身手了得嘅成龍當時都嚟唔切反應，表現得不知所措，佢驚到瞌埋眼之餘仲即時用手抹番面上嘅口水，場面搞笑。
瞓過龍失場
噚日成龍又為佢嘅慈善演唱會飛咗去哈爾濱，今次嘅演唱會係為哈爾濱兒童復康醫院籌款。大會一早安排咗近百人嘅小孩儀仗隊同一班美女喺機場列陣歡迎，成龍朝早11點抵達機場時一臉倦容，佢仲同大會要求儀式從簡，最後成龍只係喺儀仗隊前急步行過，途中有一名小朋友衝上前獻花，之後就坐車返酒店休息。
大會本來安排成龍喺下午到記者會，但記者會最後取消咗，大會解釋係因為行程上出現問題。歌迷睇咗MV後就失望離開，事後成龍解釋話：「我去到酒店冇人叫我咪瞓一陣，5點幾瞓醒先知有嘢做，但呢次都有開心事，原來我係有歌迷㗎！」
成龍被問到點樣同太太林鳳嬌維繫感情，佢話：「其實阿嬌係世界上最開心嘅女人，只係佢一直唔畀我講啫！希望佢有日可以親口講啦！」
