一班歌手昨日在九龍城廣場出席慈善活動記者會，一心為慈善出力，誰知換來一肚氣。有人將垃圾及未熄的煙蒂從商場高層丟下，更有人吐口水，官恩娜被垃圾掟中，陳小春看到煙蒂從天降時揚言若知誰是兇手，必送他一記耳光。
陳小春、官恩娜、周麗淇和關心妍等昨日在九龍城廣場出席「新城慈善唱K大晒馬@KCP」記者會，記者會在商場最底層舉行，吸引不少途人圍觀。
活動未開始，官恩娜已忍不住大吐苦水，謂有人從高處丟垃圾，令她中頭獎，官恩娜說：「仲有人吐口水㖭，好彩我都只係中咗嚿垃圾，不過都有啲嬲，雖然嚿垃圾好輕，但都唔應該丟落嚟，都唔知係咪巴士阿叔個friend——商場阿叔做嘅。」
「唔配做港人」
活動開始後，小春一上台即說：「呢個活動有咁多fans，又有咁多傳媒，都有人丟煙頭同吐口水，做嗰個馬上同我行落嚟，完全冇資格做香港人呀！」事後問小春是否被煙蒂丟中？小春不吐不快：「我冇俾煙頭丟中，個煙頭喺我側邊落地，仲要係未熄嘅薄荷煙頭，實係女仔嘅居多。啲人咁冇公德心，真係唔配做香港人，我覺得好冇面，如果做嗰個敢行落嚟，我真係兜把摑佢，佢阿爸阿媽真係好傷心，生埋啲叉燒仔同叉燒女。」
擇偶唔睇家底
此外，周麗淇最近被拍到與新歡及姊姊周汶錡與富貴外籍男友一起食飯、齊釣金龜，周麗淇昨日否認說：「我都係同家姐、成班朋友一齊食飯啫，好平常，個個都係我新歡，真係冇人同我食飯啦！」問周麗淇的擇偶條件是否一定要有家底？她說：「呢個價值觀係錯嘅，我揀朋友同男友都唔會睇佢家底，我有能力照顧自己。」
採訪：胡比
攝影：陳俊強
