與一般二十歲出頭的少女無異：Doris怕熱、怕曬、也怕累；只是，她更怕政府當市民「無到」。03年7月1日，她戴了帽、塗了太陽油，左手拿水右手拿迷你風扇，在烈日當空下的維園，暴曬足足五小時。今年，太陽伯伯熱力未減，政府施政也未見改善，Doris決定繼續以「全副武裝」，在7.1昂然走入維園，與猛烈陽光決戰到底，希望由心而發的一股熱情，感動漠視民意的「煲呔曾」。
雖肚餓心靈卻很充實
「03年，我喺維園，由晏晝一點企到六點，用咗成五個鐘先可以走出維園；嘩，嗰日真係好鬼熱，又好鬼曬，真係好似『乾煎蝦碌』咁。」那一年，還是中七學生的Doris，跟着父母、家姐及姨媽，帶齊所有防曬裝備，首次參加最感意義重大的遊行。
終於，她捱過了悶熱，走畢了全程。雙腳累得無力企直，肚皮也餓得「打鼓」，心靈卻很充實。「我愈企愈肚餓，點知隔籬個婆婆即刻送咗個包畀我。嗰一刻我好warm（溫暖），原來大家可以咁樣守望相助；我好為香港人自豪。」
「香港人仍然好硬淨」
今年願變『乾煎蝦碌』的人或者會減少，但Doris仍然自甘「上釣」，7月1日再以「全副武裝」上街遊行。「可能我今次行出嚟，未必會即時見到成效，但至少係一種表示，用一種態度去話畀煲呔聽，你唔可以因為人少少，就當我哋無到。香港人，仍然好硬淨。」
記者：許偉賢