等到頸都長，XBOX360首隻Killer級RPG《賦法戰爭》（eM），終於推出英文版，而且將於7月1日在香港正式發售。唔識日文嘅朋友都感受過，即使有攻略在手，幾十粒鐘對住啲睇唔明嘅文字，真係打到反晒白眼想放棄！上次因為《eM》只得日文顯示而卻步嘅RPG迷，今次出咗英文版，勁Game唔玩番夠本，點對得住自己！
記者︰陸俊雄
高手都讚佢靚
RPG一向係㗎仔強項，美式RPG始終唔討好亞洲機迷，所以XBOX同360都冇乜RPG好煲。呢隻《eM》由日廠FormSoftware一手包辦，為XB360增加唔少吸引力，而且憑住強大機能，多邊形及光源變化等完全可媲美《FF》，我畀9分！
比召喚獸更多變化
《eM》畫面超靚，3D立體製作細膩，但其實除咗靚之外，最引人入勝嘅地方係一眾叫「魔像」嘅機械人偶。玩家透過對戰，或者到賭場玩兩手，如角子老虎機咁，賺取稱作「Tablet」嘅貨幣，到商店買人偶加入自己隊伍，幫你殺退強敵！情形有點像《FF》經典嘅召喚獸。玩家仲可以將武器配喺人偶身上，發揮意想不到嘅攻擊力。
買「魔像」固然方便，佢哋有部份造型仲好鬼兇猛㖭。不過點型點猛都好，都唔夠自己造一個出嚟好玩；玩家喺對戰中會得到一啲叫「物質」同「核心物質」嘅東西，有咗佢哋你就可以「育成」一個「魔像」，跟住你打同升Level，又可以同武器融合，好有成功感。
超必圍攻最過癮
《eM》好講團隊精神，所以一種叫FP值（信任度）嘅東西相當重要，直接影響戰鬥時嘅表現。《eM》唔係單天保至尊遊戲，要在3×4的戰鬥方格布下幾位同伴戰鬥位置，如果FP值高，團結能量表就會好快儲滿，在圍攻同一位對手時就可出超必殺技，可謂畫面超華麗嘅「圍毆」過程！
不得不提，呢個Game各人物性格做得好出色，主角Atsuma生性火爆又有啲自大，佢個人妖同學兼好拍檔Makoto經常同佢鬧不和，大大影響FP值。所以點樣keep住戰友彼此間嘅信任度，好考玩家功力。
故事壯大有排玩
故事講述1千年前，有「最強魔像」之稱嘅冰之女皇背叛人類，更將世界破壞得體無完膚，後來人類幾經艱苦才將她封印起來。1千年後，擁有解開封印能力嘅主角錯手將女皇釋放了，為彌補過失同拯救人類，Atsuma與同伴踏上征途，展開冒險旅程。至於「賦法」呢個名，係指將一種叫「以太」嘅能量加入機械人身上，眾「魔像」就係咁樣被賦予能量替人類辦事，而Atsuma天生有解封「以太」能量嘅本領。
玩RPGGame要有耐性，一見有商店即時要入去「裝身」，買啲武器Upgraud，睇吓有冇啱使嘅「魔像」可以做融合，揀好最佳陣容，做好準備隨時應付突發戰事。小記試過唔少次冇Check清楚「魔像」狀態有冇更新，結果畀人打鑊勁嘅，唯有死死地氣再玩過。
PROFILE
遊戲類型：角色扮演（RPG）
對應機種：XB360
遊玩人數：1人
遊戲語言：英文（附中/英文手冊）
推出日期：7月1日
行貨售價：$299
