支持陳太--和藹能幹
吳小姐（學生）︰「我唔想曾蔭權做特首，佢唔知係咪因為佢屋企人多做警察，所以成日個樣都好惡咁，但陳太就和藹啲，而佢又做得嘢，以前都做得好好。」
支持陳太--敢於發言
李先生（文員）︰「陳太敢言，可以幫我哋香港人向中央講說話，做特首最好；但係曾蔭權咁驚中央，太保守，而且施政都係一般，唔係話咁好。」
支持陳太--形象親切
陳小姐（學生）︰「陳太成日笑，英文又講得好，梗係做特首最好啦，特首形象要親切吖嘛，又要成日去外國。我唔鍾意曾蔭權，佢冇乜人情味。」
支持陳太--有管治能力
招先生（文員）︰「我支持陳太做特首，因為佢有管治能力，而且個人有誠信，市民信得過佢。至於曾蔭權，我就無咩comment（評論），總之我會揀陳太。」
支持曾蔭權--陳太冇承擔
陳小姐（文員）︰「陳太退咗休啦，仲出嚟選？佢之前就咁走咗去，對香港冇承擔，又遲遲唔講明究竟選唔選特首，搞到唔清唔楚。我揀曾蔭權。」
支持曾蔭權--同中央關係好
洪先生（推銷員）︰「陳方安生做事能力係高，但我都係會選曾蔭權做特首，因為佢同中央嘅關係好啲，而且中國𠵱家咁好，對香港嚟講都有利啦。」
支持曾蔭權--有政績形象好
黃小姐（學生）︰「曾蔭權做特首之後，香港比起董建華時期好咗好多，形象又好；但陳太就好似乜都冇做過，冇成績俾我哋睇，點樣選佢做特首？」
支持曾蔭權--獲中央支持
李先生（文員）︰「我支持曾蔭權做下屆特首，因為中央都支持佢，會少好多麻煩，而佢又真係做得唔錯。陳太係殖民地時代嘅人，都過咗時啦。」
