孫柏文今日想教大家一句拉丁文，呢句拉丁文就係「MeaCulpa」，發音方法應該就係「咪亞．溝扒」。呢句拉丁文點解？就係解釋為「認錯」。大家可能會問：「點解今日孫柏文會失驚無神，教大家拉丁文？係唔係要道歉，不過冇其他開場白，所以就諗住求其搵個藉口，可以入題，務求減輕『認衰仔』之苦？」你問得咁嘅問題，絕對係《金手指》嘅柱躉式醒目fan屎，因為我今日要向大家嚟鋪MeaCulpa。
其實，上一個禮拜四晚、禮拜五凌晨，我已經有衝動即時、立刻開電腦，開啓文書處理軟件（wordprocessor）去打今日呢篇「悔過書」。無他，因為就喺上述嘅時間內，證明咗就算一個好似我咁天才橫溢、技驚四座、高瞻遠矚、能人所不能嘅蓋世豪俠，都可以完全甩轆、「大意失荊州」。今日寫呢篇「悔過書」，都係希望你哋可以原諒我。大家如果仲記得，我喺5月31日一篇題為《一注獨贏買花旗國家隊》嘅文章裏面，曾經叫過大家買花旗國家隊贏小組冠軍，咁上個禮拜四晚、禮拜五凌晨就係該小組舉行最後一個循環嘅賽事，而花旗國家隊就輸咗畀迦納國家隊，花旗國家隊亦成功成為該小組嘅「大包尾」。
呢件事畀到我兩個大教訓，第一就係千祈唔好高估花旗國足球嘅實力。第二就係財經口水佬，唔好自視過高，走去貼啲波經、馬經貼士。
希望陳太triangulate
講開「大意失荊州」呢啲我哋中華民族嘅經典政治手段，孫柏文就要講吓花旗國選舉顧問DickMorris發揚光大嘅選舉手段概念triangulation，手段嘅神髓就係要個政治家定位喺傳統「左」、「右」線之上，形成「政治三角形」。方法就係一個原本係「左派」嘅政治家，去關心啲「右派」選民關心嘅嘢。以我哋特區為例，一個「根正苗紅」嘅政治家去參選，如果高姿態反對「釋法」，話釋法可以危害長遠特區經濟利益，咁就算成功落實triangulation呢個概念。
不過喺採納呢個概念去參加選舉之前，就一定要一早鎖定自己陣營嘅全面支持。再以「根正苗紅」嘅政治家為例，反對「釋法」去參選之前，就一定要曾經高姿態反對過全民直選、民主派會晤花旗國政府官員等等。
咁孫柏文今日想用隻金手指為大家篤一個我好希望真係進行緊嘅triangulation行動，呢個政治家就係我偶像陳方安生。今次7.1遊行，陳太高姿態支持，兼夾陳太前陣子對私隱嘅高聲訴求，希望佢真係喺度鎖定民主派陣營嘅支持。到要參選特首選舉嘅時候，就來triangulation，攻擊嗰啲好似添馬艦起「Sir曾政權紀念塔」嘅不負責任財政支出，或者全力反對信奉社會主義嘅政客，以及危害新移民、畢業生、特區少數民族入行嘅「最低工資、最高工時」政策。陳太，真係希望係咁！
殖民地時代嘅亞視
同大家發完個白日夢，幻想特區政壇嘅未來之後，最後，不如同大家時光倒流，返去仲係殖民地嘅時代，感受一下當年我哋曾經分享過嘅希望。大家不妨去youtube.com，用「龍門陣」去搜尋當年嘅亞洲電視，真係同今時今日「你有理講」嘅亞洲電視好唔同。
孫柏文