喺柏林咁多日，噚日終於有機會去吓鄰近嘅漢堡市。呢個城市喺柏林西北部，自己揸車都係兩個鐘頭就到。但去到之後，發覺呢個有170萬人口嘅城市，真係好冷清。
雖然漢堡係其中一個比賽城市，但市面上世界盃嘅布置唔多，同首都柏林嘅鋪天蓋地實在相差太遠喇！外人唔了解嘅話，真係以為佢冇份舉辦賽事㖭！但幸好當地有一個魚市場，裏面設有一個露天帳篷，專門畀嗰度嘅漁民及遊人睇波，都算仲有些少世界盃氣氛啦！
漢堡臨近北海，各國嘅遊人都一定會去漢堡一次，地位得天獨厚，所以當地人雙眼真係生喺頭頂，以為自己高高在上。連用餐都非常講究，以顯示自己高人一等嘅地位。其實漢堡市話晒都係其中一個世界盃舉辦城市，希望喺當地舉行8強賽事嘅時候，氣氛會好過𠵱家啦，如果唔係真係失禮人喇！
袁彩雲
無綫世界盃直擊主持