年輕貌美經紀Karen：謝太？Karen呀。Update下你先，今日想同你講，同上個禮拜一樣，都係睇定啲先至入市。
資深股票客戶謝太：好似冇事囉喎，仲未入得市？睇報紙啲專家都話，又係入市嘅時候。究竟你覺得要睇定啲乜，先至入市？
等伯南克頓悟
Karen：又係睇聯儲局囉！睇下伯南克叔叔知道自己做緊啲乜未，好似今年3、4月大升市嘅時候，有邊個唔知聯儲局加息只會加到5.25厘就會加完？去到今日，又有邊個敢同你講聯儲局加息嘅盡頭係喺邊？5.25厘？5.5厘？6厘？6.5厘？你話市場裏面冇人知都算，最怕嘅係連伯南克叔叔都唔知呢。如果要入市，不如等到大家都肯定佢知道自己做緊乜嘅時候，都未算遲。
謝太：咁我應該繼續休息？
Karen：係呀！其實呢排打世界盃都幾好，絕對對「休息」有利。好似我男朋友咁，晚晚不眠不休咁睇波，完全唔睬我，係就係令我呢排生活苦悶啲，不過都係調理身體嘅好機會。
謝太：我直情變咗寡婦啦，我已經有3日冇同過我老公講嘢。對上一次，係同佢一齊睇阿根廷踢波。我已經好耐冇睇過波，不過啲阿根廷球員一樣咁靚仔。好似嗰個叫美斯嘅球員，見佢真係好有rhythm。
Karen：oh謝太，我都好鍾意Messi，有時見到佢喺球場上郁，真係有衝動去學拉丁舞。唔知香港有冇拉丁人教拉丁舞呢？
謝太：有。我有個朋友都有去學跳拉丁舞。不過，佢話個instructor好惡，成日都鬧佢係lazycow，又開口埋口大叫moveyourass㖭。