德國隊波成日俾人插有頭槌無腳法，淨係識高空轟炸，但最近有數據幫佢哋平反，就係德國近4場比賽共10球，全部都係用「腳」射入嘅，你話叻唔叻仔！德國教練奇連士文決心改革，以進攻足球證明畀全世界睇，佢哋可以擊敗任何隊伍，而且唔係用「轟炸機」一招咁單調；𠵱家佢哋有埋舒韋恩史迪加、普多斯基等腳法細膩嘅攻擊球員，係抵佢哋威嘅！