侍仔：今晚「長靴國」意大利對「袋鼠兵」澳洲，一場歐亞嘅對決，我就會揀澳洲力拒意大利喇，話晒澳洲𠵱家入咗亞洲足協。
菠蘿文：你唔係覺得澳洲係上屆嘅南韓吓話？雖然兩隊教練都係軒迪克。
招積域：澳洲有能力做南韓第2㗎，兩隊都要求進步，又冇足球上嘅歷史包袱。
侍仔：上場對克羅地亞，見到佢哋兩度落後都可以追平，就知隊波戰意幾咁大。
菠蘿文：意大利單打假波醜聞𠵱家仲未起訴球員，唔知有冇減低佢哋嘅戰意呢？意軍擺3個防守中場，澳洲球員點樣可以過到佢哋？
侍仔：淘汰賽最重要就係鬥心！技術上唔夠派路嚟，咪用力量去爆贏佢囉！巴西都唔驚，驚你隊意大利？加上意大利最驚呢類體力型球隊，我撐澳洲「主客和」嘅「和局」！
招積域：另一場我就撐瑞士贏啦，呢隊波擅踢穩守突擊，即使今次讓平/半，都有把握波盤齊贏。以我所見烏克蘭狀態一般，上場對突尼西亞踢多個都老鼠拉龜咁款，都係撐唔過，寧要瑞士小勝1:0。
侍仔：你又發功啦喎阿招積，你成個分組賽貼士冇中過，你隊愛隊塞黑仲要排第32名，都唔知你憑咩去貼瑞士小勝。
招積域：由外圍賽到分組賽，瑞士向來踢穩守，上場對南韓又係，你攻咪等你攻囉，我慢慢靠突擊陰你兩球，就咁搞掂。咪話我話，瑞士過到呢關，連意大利都要畀面佢，瑞士上盤同波膽1:0唔錯。
文：高洛文